Floresha Ilo ka plot 40 vite që çdo mëngjes ngrihet herët dhe pastron rrugët e Korçës.
Puntorja shtatshkurtër e fjalëpak tregon se prej 4 dekadash i ka qëndruar besnike punës së saj, për të cilën nuk ka aspak turp.
“Kam që në 1985, deri më sot 40 vite, pa shkëputje fare. Me thotë djali ajde në Francë por i them te më lere rehat, mirë jam unë këtu. Ai lutet, mos rri në Shqipëri por mirë jam këtu. Po. Unë 20 vite kam pastruar kullë e hirin, deri në Radanec, gjithë Korçën”.
Puna është e vështirë, pasi duhet të jetë në dëborë, shi e stuhi por Floresha tregon se punës nuk i bëhet” bisht”
“Ç’të bëjmë? Shumë e vështire, se po nuk punove nuk te jep njeri. Nuk i bëj bisht punës, asnjëherë. Puna është nder, do punosh. Asnjëherë. Ul kokën, puno e ike. Në dëborë, me krahët tona dalim prap. E vështirë është. Po vajta punë tjetër me duket gogol, këtu jam mësuar. Nuk e bëj dot, këtu jam mësuar”.
Pastruesit e rrugës shpesh lihen të mënjanuar por Floresha ka një përgjigje e për këtë.
“Mua të më vijë turp? Jooo. Ul kokën, puno, merr dy lek e ik ne shtëpi. Të mbash familjen. Burri me ka vdekur po bën vite, djali me ka ikur, cupat e martuara. Puna është nder, ka e dembele por ne jemi puntore,“- u shpreh ajo.
Floresha është shembulli më i gjallë i përkushtimit, dinjitetit dhe dashurisë për punën. Në një kohë kur shumë largohen për një jetë më të lehtë jashtë vendit, ajo zgjedh të qëndrojë e palëkundur në rrugët e qytetit të saj, duke dhënë kontributin me ndershmëri dhe përulësi. Ndërsa shumë kalimtarë nxitohen drejt punëve të tyre, ajo është aty çdo mëngjes, duke dëshmuar se puna e ndershme është vlerë që nuk njeh moshë, as mot.
