Sëmundjet e veshkave po kthehen në pandemi, pasi numri i të prekurve po rritet nga vitit në vit. Mjekët nefrologë shprehen se 1 në 10 persona në vendin tonë, vuajnë nga problemet në veshka. Sipas tyre ushqimet me kripë dhe konsumimi i pakët i ujit shkaktojnë pjesën më të madhe të problematikave në veshka.
Ushqimet jo të shëndetshme, mungesa e aktivitetit fizik por edhe sëmundje të tjera si diabeti dhe hipertensioni janë ndër shkaqet që ndikojnë në avancimin e komplikacioneve të sëmundjeve të veshkave.
E rëndësishme sipas mjekëve nefrologë është kryerja e shpeshtë e analizave, pasi këto sëmundje nuk shfaqin shenja dalluese.
Sëmundjet e veshkave shkaktohen edhe nga mjekimi i pakujdesshëm i patologjive të tjera, ku përdorimi i barnave me doza dhe frekuencë të pakontrolluar shkaktojnë dëmtime të funksionit renal. Më të prekur nga këto sëmundje janë të sëmurët kronike dhe të moshuarit.
