Maturantët e 6 bashkive të qarkut të Korçës zhvilluan sot provimin e gjuhës shqipe dhe letërsisë, pjesë e Maturës Shtetërore 2025. Në total, 1838 maturantë nga të gjitha gjimnazet e rajonit iu nënshtruan testit, i cili nisi në orën 10:00 dhe zgjati 2 orë e 30 minuta. Burimet zyrtare bëjnë me dije se procesi i zhvillimit të provimit kaloi normalisht dhe pa asnjë problem.
Pas përfundimit të testit, disa maturantë e konsideruan provimin të lehtë, ndërsa të tjerë e vlerësuan si më të vështirë. Matura Shtetërore do të vijojë më 17 qershor me provimin e Matematikës, ndërsa do të përmbyllet më 24 qershor me provimin me zgjedhje.
Kjo fazë e provimeve është shumë e rëndësishme për maturantët, pasi rezultatet do të ndikojnë në rrugëtimin e tyre akademik dhe profesional. Autoritetet përkatëse kanë garantuar një proces transparent dhe të drejtë për të gjithë pjesëmarrësit.
