46 raste të reja me kancer gjiri janë diagnostikuar në Korçë prej fillimit të këtij viti.
Referuar shifrave situata është pak a shumë e njëjtë me atë të një viti më parë, teksa sipas mjekes onkologe Jusilda Dervishi, vlen të theksohet fakti se ka një rritje të ndërgjegjësimit të popullatës për të bërë ekzaminime më të shpeshta sesa vite më parë.
Kjo ka bërë që një pjesë e mirë e pacientëve janë diagnostikuar në stade të hershme.
Mjekja shton më tej se rastet më të shumta të kancerit të gjirit janë mbi moshën 45 vjeç, por nuk kanë munguar edhe rastet tek moshat më të reja.
Nga viti në vit rritet interesi për të kryer ekzaminimin e gjirit, si shenjë sensibilizimi nga të gjitha gratë dhe vajzat mbi rëndësinë që ka zbulimi i hershëm si dhe trajtimi i kësaj sëmundjeje.
