Qarku i Korçës pritet të përfitojë rreth 50 milionë euro investime gjatë vitit 2026, financime të mbështetura drejtpërdrejt nga buxheti i shtetit. Projekte strategjike në fushën e shëndetësisë, arsimit, bujqësisë dhe infrastrukturës synojnë përmirësimin e shërbimeve publike dhe rritjen e mundësive për komunitetin lokal.
Një ndër investimet kryesore është ndërtimi i spitalit të ri rajonal të Korçës, i cili konsiderohet një hap i rëndësishëm për modernizimin e shërbimit shëndetësor në të gjithë zonën juglindore. Struktura e re do të përfshijë urgjencë multifunksionale dhe pediatrike, pavione të standardeve bashkëkohore, katër salla operacioni, reanimacion dhe një pavion të specializuar të Hemodinamikës.
Në fushën e arsimit dhe zhvillimit të të rinjve, Poli i Dijes synon të kthehet në një qendër moderne edukimi dhe trajnimi profesional. Projekti parashikon laboratorë të dedikuar dhe hapësira zhvillimi që do t’u mundësojnë të rinjve të studiojnë dhe të realizojnë projekte inovative brenda qytetit të tyre.
Një tjetër pikë e rëndësishme është Ferma e Mollëve, e ideuar për kultivimin, trajtimin dhe eksperimentimin e nënprodukteve të mollës me teknologji të avancuar. Investimi do të mbështesë fermerët në procesin e menaxhimit dhe përpunimit të prodhimit bujqësor, duke ofruar mundësi për rritje të produktivitetit.
Këto iniciativa janë pjesë e një pakete të gjerë investimesh që përfshijnë gjithashtu përmirësimin e rrugëve, hapësirave komunitare dhe institucioneve arsimore, me synim ndikimin e drejtpërdrejtë në cilësinë e jetës dhe përditshmërinë e qytetarëve të qarkut.
