Këtë 8 mars me siguri nuk do mungojnë në ekranet e emisioneve televizive Damat e Shoqatave për Mbrojtjen e të Drejtave të Grave, të cilat do na japin leksione, por nuk do të na thonë asnjë fjalë se ku shkojnë financimet e shtetit dhe ndërkombëtarëve për të forcuar rolin e pozitës së gruas.
Ato do ti shohim në studiot e gazetareve që marrin ndonjë honorar në këto shoqata dhe nuk do guxojnë ti pyesin se si qëndron e vërteta e skllavërimit modern në punë të gruas shqiptare. Nuk do mungojnë shkrimet ne facebook të këtyre zonjave dhe atyre që ju servilosen që do i komplimentojnë për punën e shkëlqyer dhe në fund pasi të mbarojë fasada me siguri me ato para që janë dhënë për të trajnuar gratë se si duhet të kërkojnë të drejtat e tyre do të shkojnë në ndonjë restorant e do festojnë, e sigurisht nuk do mungojnë fotot në facebook e instagram dhe komentet për veshjen lukun e performancën.
Por sic do 8 Mars askush nuk kujtohet për gratë që punojnë në biznesin fason. Këto zonja janë krenaria e shoqërisë tone, viteve të fundit nuk kanë munguar problemet në masë të grave që punojnë në fasoneri dhe shumë pak bëhet për të ndryshuar realitetin e punës së tyre. Këto zonja janë heroinat që të paktën në 8 mars duhet të jenë të ftuara në media që të flasin për të drejtat e tyre të mohuara, për pagën minimale që në shumë raste pronarët refuzojnë t’ua japin, të flasin për kërkesat absurde të pronarëve që u kërkojnë të mos mbeten shtatzënë me pretendimin nihilist se humbasin rendimentin. Gratë shqiptarë skllavërohen nga pronarët e biznesit fason, kryesisht ata të huaj që vijnë këtu për krahun e lirë të punës. Shumë prej këtyre grave në një vend me varfëri ekstreme si i yni janë shtylla e familjes.
Me djersën e tyre ushqehet familja, shkollohen fëmijët dhe ruhet dinjiteti i familjes. Lipset nevoja që ti kërkohet politikanëve kryesisht grave të parlamentit dhe pushtetit vendor që të mos i përdorin gratë e fasonerive si fasadë sa herë ka zgjedhje por te ngrenë grupe pune në mënyrë që dinjiteti i kësaj kategorie të mos nëpërkëmbet.
Koha kur shkohet në fasoneri për të bërë foto për t’i hedhur në facebook duhet te marrë fund, pasi nuk keni asnjë të drejtë të abuzoni me djersën e këtyre grave që janë heroina.
Konfederata e Sindikatave
