Të gjithë mjekët në përgjithësi gëzojnë respektin e komunitetit për shërbimin që ata ofrojnë, por kur bëhet fjalë për shërbimin mjekësor që u jepet fëmijëve që janë dobësia e çdo prindi dhe gjyshi, atëherë ky respekt dy apo trefishohet.
Spitali i Pogradecit është nga ato spitale që ka një pavion të madh pediatrie kjo për shkak të numrit të lartë të vizitave që pret në periudha të ndryshme të vitit. Në vjeshtë apo dimër kur virozat kanë qarkullim të lartë apo edhe në verë kur popullsia në Pogradec trefishohet si pasojë e sezonit e veror e bashkë me to edhe numri i fëmijëve që kërkojnë ndihmë mjekësore.
Bexhet Liçkollari është drejtuesi i këtij pavioni në Pogradec, siç thonë në përgjithësi për këtë kategori mjekësh, janë të një kalibri mjaft të lartë dhe që rrallë herë i vijnë komunitetit. Bexheti ka aq shumë vite si doktor në pediatrinë e Pogradecit saqë askush nuk mund të mos e ketë takuar të paktën njëherë kur ka qenë fëmijë.
Aq shumë vite ka që shërben aty saqë fëmijët e dikurshëm që mjekoheshin prej tij, sot çojnë edhe fëmijët e vetë për tu vizituar nga doktori.
Doktor Bexheti është i papërtuar, babaxhan dhe sqarues, aq sa nuk ndodh që mos të të hapë edhe telefonin në çdo orë të ditës dhe mbrëmjes. Ata që e njohin e kuptojnë shumë mirë se çfarë po them.
Ai nuk e ka menduar kurrë largimin nga Shqipëria, është nga ata mjekë që ka punuar edhe me rrogat qesharake por se gjithmonë ka dashur ti shërbejë qytetit të vet. Është nga mjekë që gjithmonë e ka ngritur zërin edhe kur ka parë probleme në sistemin shëndetësor, është nga ata mjekë që po i afron pensioni por që gjithmonë emri i tij do mbetet në këtë pavion, si mjeku babaxhan që të diagnostikonte qoftë edhe duke të parë vetëm me sy.
I urojmë jetë të gjatë dje plot shëndet mjekut Liçkollari
