Nikolla Niça është mjeku që ngriti pavionin e parë të kirurgjisë në Pogradec.
Në vitin e largët 1970 e deri më sot “krijesa e tij” i ka shërbyer brezave dhe mijra pacientëve që kryen operacione të ndryshme aty.
Jeta fizike e Nikollës do të ndërpritej shpejt, në moshën 46 vjeçare, por pas mbeti kontributi i tij dhe emri që vazhdon të jetojë edhe sot.
I lindur në Niçë, fëmijërinë e tij e jetoi në rrugicat e lagjes “Topleci”. Shkollimin 7 vjeçar e kreu në shkollën “Reshit Çollaku“ (Gjok Shqiptari sot)
Më 1956 nis studimet për mjekësi në Tiranë, për t’i përfunduar me rezultate të larta në vitin 1961. Edhe pse në Tiranë, dëshira e tij ishte të rikthehej në Pogradec për t‘u shërbyer pogradecarëve.
Ditën e parë të profesionit të mjekut e ushtron në Trebinjë, kontributin, vullnetin dhe sakrificën e kujtojnë ende sot banorët e zonës.
Ndërsa ishte në Trebinjë, e shikonte si detyrim dhe lehtësim njëkohësisht që Pogradeci të kishte Pavionin e tij të Kirurgjisë. Pacientët mos sorrollateshin në Korçë dhe Tiranë, prandaj ishte shumë e nevojshme hapja e këtij pavioni.
Në Mokër punoi deri në vitin 1967, më pas u largua në Tiranë për të zgjeruar studimet e tij, pikërisht në kirurgji.
Por dashuria për Pogradecin e thërriste në çdo kohë dhe ai rikthehet si mjek kirurg.
Me rikthimin e tij mjeku i parë kirurg pogradecar, Nikolla Niça, angazhohet dhe ngre pavionin e parë të kirurgjisë në qytet.
Kontributi i tij ishte jo vetëm në ngritjen e Pavionit si bazë materiale por ndihmoi dhe afroi infermierë e mjekë të rriteshin profesionalisht.
Ndarja para kohe nga jeta nuk e shuajti emrin e mirë të Nikolla Niçës. Ai la pas shembullin e pogradecarit vullnetin, pasionin dhe kontributin t’ia përkushtonte vendlindjes së tij.Marrë nga Gazeta Pogradeci
