Bashkia e Korçës ka nisur një ndërhyrje të rëndësishme për pastrimin dhe sistemimin e kanaleve të treta kulluese, me qëllim përmirësimin e infrastrukturës së ujitjes për fermerët e zonës. Aktualisht, po punohet intensivisht në zonën e Barçit, ku po kryhet pastrimi i përroit të Barçit në të gjithë gjatësinë e tij, si dhe në kanalet e treta të ish NB-së (Ndërmarrja Bujqësore). Kjo ndërhyrje ka ardhur si përgjigje ndaj kërkesave të shumta të fermerëve, të cilët, për shkak të mungesës së reshjeve në këtë periudhë, kanë hasur vështirësi në sigurimin e ujit për vaditjen e perimeve të mbjella.
Leonard Fejzolli, Specialist pranë Njësisë së Shërbimeve Publike në Bashkinë e Korçës, ka deklaruar se puna po ecën me ritme të mira dhe synohet që të përfundojë brenda dy javëve të ardhshme. “Kjo ndërhyrje është thelbësore për të ndihmuar fermerët të përballojnë mungesën e reshjeve dhe të sigurojnë ujë për të mbajtur në gjendje optimale kulturat bujqësore. Po pastrojmë të gjithë përroin e Barçit, si dhe po ndërhyjmë në kanalet e treta, të cilat janë shumë të rëndësishme për rrjedhjen dhe qarkullimin e ujit në parcelat bujqësore,” është shprehur Fejzolli.
Fermerët e zonës kanë shprehur mirënjohjen për këtë ndërhyrje, duke e konsideruar atë si një mbështetje të nevojshme në një periudhë kur reshjet kanë qenë të pakta dhe burimet ujore janë të kufizuara. Pastrimi i kanaleve do të lehtësojë furnizimin me ujë, do të rrisë rendimentin e prodhimeve bujqësore dhe do të shmangë problemet me thatësirën, e cila ka ndikuar ndjeshëm në zhvillimin e kulturave bujqësore në zonë.
Bashkia e Korçës ka bërë të ditur se ky është vetëm një nga investimet që do të ndërmerren në mbështetje të sektorit bujqësor, duke synuar përmirësimin e kushteve të vaditjes dhe rritjen e prodhimit bujqësor në zonën e Korçës. Ndërhyrja në kanalet e treta kulluese dhe në përroin e Barçit pritet të përmirësojë ndjeshëm cilësinë e vaditjes dhe të krijojë kushte më të mira për fermerët në sezonin e ardhshëm bujqësor.
