Fermerët në qarkun e Korçës po vijojnë me procesin e plehrimit dhe plugimit të tokave, për të siguruar një prodhim të mbarë dhe cilësor të kulturave bujqësore. Arben Dulellari, drejtor i Bujqësisë dhe Mbrojtjes së Konsumatorit në Bashkinë e Maliqit, ka bërë të ditur se këto procese janë të domosdoshme për përgatitjen e tokës dhe përmirësimin e strukturës së saj, duke ndikuar pozitivisht në rritjen e prodhimit.
Sipas Dulellarit, plehrimi është i nevojshëm sidomos për kulturën e grurit, pasi e furnizon atë me elementët e domosdoshëm ushqyes për zhvillim të shëndetshëm. Ndërkohë, plugimi i tokës shërben për përmbysjen e dëmtuesve dhe përgatitjen e terrenit për mbjelljet pranverore.
“Proceset e plehrimit dhe plugimit janë kyçe për një prodhim të mbarë. Fermerët duhet të tregojnë kujdes në përzgjedhjen e kohës dhe teknikave të duhura për të shmangur dëmtimet e mundshme në të mbjella,” është shprehur Dulellari.
Qarku i Korçës mbetet një nga zonat kryesore për kultivimin e grurit në vend, me mbi 12 mijë hektarë tokë të mbjellë çdo vit. Tradita e gjatë e kultivimit të grurit në këtë zonë dhe kujdesi i fermerëve për zbatimin e praktikave të duhura bujqësore, pritet të sjellin një prodhim të bollshëm edhe këtë sezon.
