Spektakli më i madh rinor “Rin Show” rikthehet këtë vit me edicionin e tij të 17-të, duke sjellë në skenë një atmosferë të jashtëzakonshme arti, energjie dhe pasioni rinor. Për disa netë me radhë, të rinjtë nga gjimnazet e qytetit do të konkurrojnë mes tyre duke shpalosur talentin në disiplina të ndryshme si këndimi, kërcimi, baleti, aktrimi dhe moda.
Ky aktivitet do të zhvillohet në teatrin “Andon Zako Çajupi”, ku aktualisht po zhvillohen intensivisht provat. Aktori Franc Bregu do të jetë pjesë e këtij spektakli, duke dhënë kontributin e tij në përgatitjen artistike të të rinjve.
Nën kujdesin e koreografit të njohur Bardhi Pojani dhe organizatores Blerta Belliu, drejtoreshë e Qendrës Kulturore “Vangjush Mio”, të rinjtë janë në prag të sjelljes së performancave nga më të bukurat, që premtojnë emocione dhe argëtim për publikun.
“Rin Show” është kthyer tashmë në një traditë të dashur për qytetin, duke qenë një platformë e rëndësishme për promovimin e talenteve të reja dhe për fuqizimin e zërit të rinisë në art e kulturë.
