Një ndërtesë historike e qytetit, Kinemaja e vitit 1952, po i nënshtrohet një rikonstruksioni të plotë që do të ruajë arkitekturën autentike të godinës, duke e pasuruar me elemente moderne. E quajtur tashmë “Kinemaja e Re”, kjo hapësirë do të transformohet në një qendër të gjallë arti dhe komuniteti.
Objekti do të shërbejë si një kinema bashkëkohore, teatër kukullash për më të vegjlit, si dhe si një qendër multifunksionale për banorët e bashkisë Maliq. Projekti synon jo vetëm ruajtjen e trashëgimisë kulturore të qytetit, por edhe nxitjen e jetës kulturore dhe përfshirjes komunitare.
Kjo nismë është një hap i rëndësishëm drejt rigjallërimit të jetës urbane në Maliq dhe një mundësi e re për artin, kulturën dhe bashkëpunimin qytetar.
