Në një atmosferë të mbushur me ngjyra, emocion dhe krijimtari, u zhvillua në oborrin e Muzeut Kombëtar të Arsimit ekspozita e fëmijëve të kursit të pikturës, vizatimit dhe art&craft, pranë Qendrës Kulturore “Mihal Grameno”.
Kjo ekspozitë, e cila përmbyll një vit të tërë pune dhe zhvillimi artistik, solli në sytë e publikut punimet plot fantazi, ngjyra dhe pasion të fëmijëve, dëshmi e një rruge të ndërtuar me dashuri për artin dhe për vetë shprehjen e lirë krijuese.
Artistët e vegjël, të mbështetur nga instruktorët e tyre të përkushtuar, ndanë me prindërit, të ftuarit dhe dashamirësit e artit momentet e rritjes së tyre përmes krijimit. Për shumë prej tyre, kjo ishte hera e parë që prezantonin punën e tyre në një ekspozitë publike, duke përjetuar emocionet e një debutimi të paharrueshëm.
Një falënderim i veçantë iu drejtua instruktoreve të kurseve, të cilët me durim dhe përkushtim kanë ndihmuar fëmijët të zhvillojnë jo vetëm aftësitë teknike, por edhe vetëbesimin dhe dashurinë për artin.
Ky aktivitet kishte si synim jo vetëm të vlerësojë krijimtarinë individuale të fëmijëve, por edhe të ndërtojë ura frymëzimi mes brezit të ri dhe trashëgimisë kulturore, në një vend simbolik siç është Mësonjëtorja e Parë Shqipe.
Ekspozita ishte e hapur për vizitorët, të cilët u bashkuan dhe u bënë pjesë e këtij rrugëtimi artistik të brezit të ardhshëm të krijuesve korçarë. Një aktivitet që tregon se e ardhmja e artit fillon që në vogëli, me laps, me ngjyrë dhe me zemër.
