Biblioteka e fëmijëve “Thoma Turtulli” në Korçë, një institucion i dashur për breza të tërë, po i nënshtrohet një procesi të plotë rikonstruksioni. Godina e dhuruar dikur nga filantropi Thoma Turtulli për fëmijët e qytetit, ndodhet aktualisht në një fazë pune, e cila ka ngjallur diskutime dhe reagime të shumta në rrjetet sociale.
Në disa prej fotove të shpërndara së fundmi, vihen re dyert e hequra të godinës, çka ka çuar në keqkuptime mbi fatin e objektit dhe karakterin e ndërhyrjes. Por në realitet, bëhet fjalë për një proces të mirëfilltë restaurimi. Dyert dhe dritaret janë çmontuar për t’u restauruar, me qëllimin që të rikthehen sërish në formën e tyre origjinale, duke ruajtur në mënyrë të plotë identitetin arkitektonik të bibliotekës.
Rikonstruksioni parashikon ndërhyrje të gjithanshme në strukturë, duke përfshirë fasadën, çatinë, sistemet e brendshme, si dhe krijimin e hapësirave funksionale dhe bashkëkohore për fëmijët. Biblioteka pritet të përfitojë një transformim që do ta bëjë më të përshtatshme për nevojat e brezit të ri, me kënde leximi të hapura, ambiente teknologjike dhe mundësi më të mira për zhvillim kulturor.
Ky investim përfaqëson jo vetëm një përmirësim të infrastrukturës, por edhe një angazhim për të ruajtur trashëgiminë historike të qytetit, duke i dhënë jetë të re një prej institucioneve më simbolike për edukimin dhe formimin e fëmijëve në Korçë.
