Ekspozimi i zgjatur ndaj rrezeve të diellit në ditët e nxehta të verës mund të shkaktojë një sërë problemesh në lëkurë, ku më shqetësuesi mbetet rreziku i infeksioneve. Dermatologët bëjnë thirrje për kujdes të shtuar, veçanërisht gjatë orëve të mesditës, kur rrezatimi ultravjollcë është më i fortë.
Sipas mjekes dermatologe Laura Hyska, temperaturat e larta gjatë verës ndikojnë negativisht tek të gjitha moshat, duke përfshirë edhe fëmijët, ndërsa më të rrezikuar mbeten personat me sëmundje kronike të lëkurës. Infeksionet sezonale janë një prej shqetësimeve më të shpeshta që sjell vera.
“Për fëmijët është tepër e rëndësishme të shmanget ekspozimi në diell në orët kur rrezatimi është më i lartë,” thekson mjekja Hyska.
Dermatologët këshillojnë përdorimin e kremrave mbrojtës ndaj diellit, qëndrimin në hije gjatë orëve të mesditës dhe hidratimin e vazhdueshëm si mënyrat më të sigurta për të mbrojtur lëkurën në stinën e nxehtë.
