Gjysma e dytë e muajit gusht ka sjellë një fluks të jashtëzakonshëm pushuesish dhe emigrantësh në të gjithë vendin, duke shkaktuar trafik të rënduar në akset kryesore rrugore dhe radhë të gjata në pikat kufitare të Shqipërisë. Situata paraqitet veçanërisht e ngarkuar në hyrjet e qyteteve bregdetare dhe turistike, si dhe në pikat e kalimit kufitar me Kosovën dhe Greqinë.
Bllokohet Durrësi dhe Berati nga fluksi i automjeteve
Në qytetin e Durrësit, pesëmbëdhjetëditëshi i dytë i gushtit ka shënuar fluksin më të lartë të këtij sezoni turistik. Mijëra automjete kanë mbetur të bllokuara për disa orë në trafik, sidomos gjatë paradites, në aksin që lidh autostradën Tiranë-Durrës me Plepat dhe plazhet e Durrësit e Kavajës. Kjo rrugë nacionale, e cila shërben edhe si nyje lidhëse me jugun e vendit, ka mbajtur ngarkesën më të madhe të qarkullimit.
Ndërkohë, në qytetin e Beratit, ardhja e emigrantëve dhe turistëve ka krijuar vështirësi të mëdha në qarkullim. Trafiku i rënduar është përqendruar në hyrje të qytetit, në aksin mes dy urave që njihet si rrethrrotullimi i Ullirit, si dhe përgjatë rrugës pranë lumit Osum. Për shkak të strukturës së Beratit, i cili përshkohet nga vetëm një aks kryesor, çdo ngarkesë reflektohet menjëherë në të gjitha rrugët, duke detyruar Policinë Rrugore të vendoset në kryqëzimet kryesore për të menaxhuar situatën.
Lëvizje të shumta në Morinë dhe Qafë Botë
Fluksi i lartë i pushuesve nga Kosova, të cilët mbeten grupi më i madh i turistëve në bregdetin shqiptar dhe veçanërisht në Shëngjin, është reflektuar edhe në pikën kufitare të Morinës. Sipas të dhënave zyrtare nga Drejtoria Vendore për Kufirin dhe Emigracionin, të shtunën nga ora 05:00 deri në orën 11:00, në Shqipëri kanë hyrë 18,092 qytetarë të Kosovës me 4,673 mjete të vogla dhe autobusë. Kjo shifër shënon një rënie prej rreth 27% krahasuar me të shtunën e kaluar, kur u regjistruan 24,764 qytetarë me 6,247 mjete. Kjo rënie i atribuohet largimit të një pjese të diasporës kosovare, megjithatë fluksi pritet të rritet sërish para fillimit të vitit të ri shkollor më 1 shtator.
Ngarkesë e lartë është regjistruar edhe në pikën kufitare të Qafë Botës në jug të vendit. Gjatë 24 orëve të fundit, nëpërmjet kësaj pike kanë hyrë dhe kanë dalë rreth 10 mijë shtetas shqiptarë dhe të huaj. Për të përballuar fluksin dhe radhët e krijuara, në anën shqiptare po punohet me katër sportele, ndërsa në anën greke procedurat po kryhen përmes dy sporteleve.
