Prodhimi i grurit në Bashkinë e Maliqit ka mbetur tërësisht stok në magazina, duke sjellë humbje të mëdha për fermerët lokalë si pasojë e mungesës së tregut dhe çmimeve tejet të ulëta që nuk mbulojnë kostot e prodhimit.
Në fshatin Rrëmbec, një nga zonat më të njohura për kultivimin e kësaj kulture, fermeri Fuat Orhan mban të bllokuar në magazinat e tij mbi 2 mijë kuintalë grurë të pashitur. Me një përvojë prej më shumë se 25 vitesh në bujqësi, ai tregon se këtë vit nuk ka arritur të shesë asnjë kilogram prodhim.
“U përkeqësua situata. Këtu janë mbi 2 mijë kuintalë. Me 28 dhe nuk ka kërkesë. Mendo qiratë e tokave, punimet bujqësore, naftën, nitratet me çmime marramendëse. Nuk ndien kënaqësi për punën që bën. Nafta me 220 lekë. A punohet me toka? E ndez dot zetorin?”, shprehet fermeri Fuat Orhan, duke vënë në dukje rritjen e papërballueshme të kostove të karburantit dhe inputeve bujqësore.
Kosto të larta dhe mungesë blerësish në Orman
Të njëjtën situatë të rëndë konfirmon edhe Jani Busha, një tjetër fermer nga fshati Orman. Ai thekson se gruri po grumbullohet nëpër magazina, por çmimi i ofruar aktualisht nuk arrin të mbulojë as shpenzimet minimale të investuara në tokë.
“25-26, e grumbullojmë. Nuk i nxjerr shpenzimet. Nuk arrihen dot shpenzimet e grurit që i hedhim në tokë. Ku ta çosh? S’ka ardhur asnjë të pyesë. Nuk dimë ç’do bëhet. Sytë nga dielli po i mbajmë. Vit për vit ky është. Fermeri po falimenton”, thotë Jani Busha.
Fermerët e zonës së Maliqit po përballen me një krizë të dyfishtë: nga njëra anë magazinat e tyre janë plot me grurë të pashitur, ndërsa nga ana tjetër kostot e inputeve bujqësore, karburantit dhe punimeve të tokës vazhdojnë të rriten. Prodhuesit kërkojnë ndërhyrje urgjente shtetërore për të garantuar tregun dhe për të vendosur një çmim dysheme që mbulon shpenzimet, duke paralajmëruar se pa mbështetje, bujqësia në këtë qark po shkon drejt rrënimit të plotë.
