Një aksident i rëndë rrugor është regjistruar pasditen e sotme pranë fshatit Qatrom, në njësinë administrative Pojan, Maliq. Një automjet ka dalë nga rruga, duke përfunduar jashtë karrexhatës.
Si pasojë e aksidentit, është lënduar rëndë drejtuesi i mjetit, i cili është transportuar me urgjencë në Spitalin Rajonal të Korçës. Mësohet se ai ndodhet në gjendje kritike për jetën.
Në vendngjarje kanë mbërritur forcat e policisë dhe grupi hetimor, të cilët po punojnë për të zbardhur shkaqet e aksidentit. Paraprakisht dyshohet se drejtuesi i mjetit ka humbur kontrollin për shkak të shpejtësisë së lartë dhe lagështirës në rrugë.
