Një aksident i rëndë rrugor ka ndodhur pak minuta më parë në Maliq, ku një automjet tip “Volkswagen” ka dalë nga rruga në rrethrrotullimin kryesor të qytetit dhe është përplasur me një pemë, disa metra larg karrexhatës.
Sipas dëshmitarëve në vendngjarje, makina po lëvizte me shpejtësi të lartë në momentin e humbjes së kontrollit, duke shkaktuar panik te klientët e një lokali të afërt, të cilët ndodheshin shumë pranë zonës ku ndodhi përplasja.
Si pasojë e aksidentit, drejtuesi i mjetit ka mbetur i plagosur rëndë dhe është dërguar me urgjencë në Spitalin Rajonal të Korçës, ku po merr trajtim mjekësor.
Policia ka mbërritur në vendngjarje dhe ka nisur hetimet për të sqaruar plotësisht rrethanat e aksidentit. Dyshimet e para flasin për një shpejtësi tej normave të lejuara si shkakun kryesor të ngjarjes.
