Një aksident i rëndë rrugor është shënuar mbrëmjen e sotme në segmentin Voskop–Korçë, ku një grua ka humbur jetën pasi u përplas nga një automjet.
Sipas informacioneve paraprake, viktima po udhëtonte me biçikletë në drejtim të Korçës, e ngarkuar me prodhime bujqësore, kur u godit nga pas nga një mjet në lëvizje. E plagosur rëndë, ajo u transportua menjëherë në spitalin rajonal të Korçës, por fatkeqësisht nuk arriti t’i mbijetojë plagëve.
Burime nga vendngjarja bëjnë me dije se mungesa e ndriçimit në këtë aks rrugor dhe fakti që biçikleta nuk kishte pajisje sinjalizuese kanë vështirësuar dukshmërinë për drejtuesin e mjetit. Policia ka nisur hetimet për të sqaruar rrethanat e sakta të ngjarjes.
Ky segment rrugor është konsideruar prej kohësh problematik, pasi përdoret shpesh nga fermerë që lëvizin me biçikleta apo mjete të tjera të ngadalta, duke shtuar rrezikun e aksidenteve.
