Petrika Riza, qytetari dhe aktori model korçar sot feston ditëlindjen e tij të 77. Kolibri.al e uron të ketë plot shëndet e jetë
Petrika Riza ka lindur në 1 qershor 1947 në qytetin e Korçës. Fillon jetën e tij profesionale që në moshë të re, në vitin 1964, duke u aktivizuar në trupën amatore të Teatrit të Korçës. Më pas do të bëhet aktor profesionist në Teatrin ?Andon Z. Çajupi? të po këtij qyteti. Të shumta janë rolet e tij si në Teatër ashtu edhe në Kinematografi.
Interpretimi i tij i parë në kinematografi do të jetë në rolin e brigadierit të repartit të saldatorëve në filmin “Montatorja”, në vitin 1970. Më tej do të vazhdonin më se 20 interpretime në filma artistikë dhe televizivë.
Shtati i lartë, zëri i plotë, qetësia dhe siguria skenike apo dhuntia për të krijuar një gjendje emocionale të ngarkuar, vetëpërmbajtja, e kanë bërë lojën e tij aktoriale të pëlqyer dhe për publikun.
Ka luajtur mjaft role, si te dyta dhe te vogla, po ashtu edhe kryesore e protagoniste. Xhaxha Madhi në shfaqjen ?Rruga e Madhe? të Vangjush Zikos(1974), Xhon Kelleri tek ?Ishin të gjithë bijtë e mi? e A. Milerit (1976), dhespoti Filothe te ?Plumbat e shkronjave? e Naum Priftit(1980), komisari te ?Përbindëshi?(1983), Volpone te Volpone e B. Xhonsonit, prokurori te ?Denoncimi? e Ruzhdi Pulahës etj.