Pas një sezoni shumë pozitiv, ku mbylli kampionatin mes tri skuadrave më të mira, ekipi i vajzave të Pogradecit është më i vendosur se kurrë: objektivi i vetëm për sezonin e ri është fitimi i titullit kampion.
Nën drejtimin e trajnerëve Besnik Lisha dhe Saimir Dragoi, skuadra ka ruajtur bërthamën kryesore të formacionit, duke u përforcuar njëkohësisht në çdo repart. Emra si Paola Gjata, Edona Kallundra, Natalja Mato, Adela Përrenjasi, Kejda Kodra, Stela Agolli dhe Emanuela Ramo përbëjnë boshtin e një grupi me eksperiencë dhe cilësi, ndërsa afrimet nga jashtë si Da Silva nga Brazili dhe Stanford nga SHBA e çojnë skuadrën në një nivel ndërkombëtar.
Në merkato është afruar edhe Anxhela Mehmeti, një lojtare e re dhe premtuese, e konsideruar si një investim strategjik për të ardhmen e klubit.
Në një kampionat ku Skënderbeu dhe Tirana nuk shihen më aq të pathyeshme, Pogradeci është pozicionuar natyrshëm mes pretendentëve kryesorë për titull. Dinamo mbetet rivali më i fortë në letër, por vajzat pogradecare kanë treguar se janë të gatshme të sfidojnë çdo kundërshtar.
Merita i takon edhe menaxhimit të shkëlqyer të klubit, ku drejtori Dorian Latifllari ka krijuar një ambient të qëndrueshëm dhe konkurrues, brenda dhe jashtë fushe.
Pogradeci në volejboll për femra është gati për titullin kampion. Këtë herë, sezoni nuk është thjesht sportiv – është një mision që i gjithë qyteti e ndjen!
