Në kuadër të Javës Europiane të Trashëgimisë Kulturore, në bashkëpunim me Drejtorinë Rajonale të Kulturës Korçë, në ambientet e Qendrës Muzeale të Tumës së Kamenicës u zhvillua aktiviteti me temë “Arkeologjia Digjitale”.
Ky organizim synoi të afrojë publikun me vlerat kulturore, historike dhe arkeologjike të qarkut të Korçës, duke i ofruar një eksperiencë gjithëpërfshirëse dhe ndërvepruese. Programi përfshiu prezantime nga arkeologë dhe studiues, të cilët theksuan rëndësinë e dokumentimit dhe ruajtjes së trashëgimisë përmes teknologjive moderne digjitale.
Pjesëmarrësit patën gjithashtu mundësinë të marrin pjesë në një guidë të posaçme në sitin arkeologjik, ku u njohën nga afër me historinë dhe veçantitë e Tumës së Kamenicës, duke përjetuar mënyra inovative interpretimi përmes mjeteve bashkëkohore.
Një moment i veçantë i aktivitetit ishte prezantimi i punës së Qendrës MEET, e cila ka realizuar për herë të parë modelimin 3D të 30 monumenteve të kulturës, kryesisht kala të qarkut Korçë. Një pjesë e tyre u shfaqën për publikun, duke shërbyer si bazë për një arkiv modern dhe digjital të trashëgimisë kulturore.
Diskutimet e ditës theksuan domosdoshmërinë e integrimit të teknologjisë në shërbim të ruajtjes dhe promovimit të trashëgimisë, për ta bërë atë më të aksesueshme për brezat e sotëm dhe të ardhshëm.
Ky aktivitet dëshmoi se trashëgimia kulturore nuk është vetëm kujtim i së shkuarës, por një burim i gjallë edukimi, identiteti dhe zhvillimi të qëndrueshëm, duke përfaqësuar një shembull të mirë të bashkëpunimit institucional dhe angazhimit qytetar.
