Artefakte nga vendbanimi më i vjetër i Evropës janë gjetur në kufirin mes Shqipërisë dhe Maqedonisë së Veriut. Këto zbulime hapin perspektiva të reja për arkeologët.
Në ujërat e liqenit të Ohrit, në kufirin mes Shqipërisë dhe Maqedonisë së Veriut, arkeologët kanë gjetur kunja druri, disa mijëra vjeçare. Këto objekte i përkasin asaj që mund të jetë vendbanimi më i vjetër në Evropë, sipas shkencëtarëve.
“Sipas të dhënave të gjetura, kjo koloni daton që nga fillimi i periudhës neolitike, pra rreth 5800 vjet para erës sonë, pra është 6800 vjeçare, çka e bën deri tani koloninë më të vjetër të banimit me grumbull në Evropë”, thotë Froseda Tola, arkeolog i përfshirë në hulumtim.
Këto zbulime hapin perspektiva të reja për kërkime në historinë e qytetërimit evropian.
“Kjo tregon se qytetërimi dhe kolonitë janë vërtet të lashta në Evropë, sepse deri më tani të vetmet koloni të gjetura janë në Azi, në Afrikë. Në Evropë u vonua pak me datën, por tani tregon se këtu erdhën edhe njerëzit. Bujqësia është përdorur këtu më herët nga sa e imagjinonim, ndaj është shumë e rëndësishme për historinë e Evropës” shpjegon Froseda Tola.
Mostrat janë duke u analizuar aktualisht në Universitetin e Oksfordit dhe pritet të japin përgjigje të rëndësishme për mënyrën se si njerëzit kanë jetuar 8000 vjet më parë në Evropë.
