Policia e Korçës ka kryer një sërë arrestimesh dhe procedimesh penale gjatë 24 orëve të fundit. Në Maliq, u vunë në pranga babë e bir, V. L. (50 vjeç) dhe S. L. (23 vjeç), banues në fshatin Pocestë, pasi dyshohet se kanë ushtruar dhunë fizike ndaj një 24-vjeçari për motive të dobëta.
Ndërkohë, janë proceduar penalisht dy shtetas nga fshatrat Sovjan dhe Bregas, të cilët akuzohen për dëmtim të sipërfaqeve të tokave bujqësore të bashkëfshatarëve të tyre.
Specialistët e Krimeve Ekonomike kanë referuar materialet për një 25-vjeçar nga Tirana dhe një 57-vjeçare nga Korça, të dyshuar për përvetësim fondesh dhe mashtrim me shitjen e pajisjeve kompjuterike, nga të cilat pesë njësi janë sekuestruar. Po ashtu, një 41-vjeçar nga Korça është proceduar pasi iu gjet kokainë gjatë kontrollit fizik.
Në një ngjarje tjetër, në fshatin Çiflig u përfshi nga flakët një sipërfaqe toke me bimë të mbjella, pasi dyshohet se zjarri ka ardhur si pasojë e një shkëndije elektrike.
Materialet i janë referuar Prokurorisë së Korçës për veprime të mëtejshme ligjore.
