Drejtoria Vendore e Policisë Korçë ka zhvilluar një sërë veprimesh gjatë 24 orëve të fundit, duke arrestuar, proceduar penalisht dhe shpallur në kërkim disa shtetas për vepra të ndryshme penale në qytetet e Korçës, Pogradecit dhe Maliqit.
Arrestim në gjendje të dehur:
Specialistët e Sektorit të Qarkullimit Rrugor arrestuan në flagrancë shtetasin Xh. M., 40 vjeç, pasi u kap duke drejtuar automjetin nën efektin e alkoolit.
Armëmbajtje pa leje dhe shkelje në vendin e punës:
Në vijim të kontrolleve në territor, shërbimet e Komisariatit të Policisë Korçë referuan materialet në Prokurori, ku nisën procedimet penale për disa shtetas:
A. H., 53 vjeç, banues në fshatin Leshnjë, u kap në një zonë të pyllëzuar me armë gjahu pa leje.
J. L., 37 vjeçe, banuese në Korçë, pasi në biznesin e saj u konstatuan punonjës të paregjistruar.
Vjedhje, kanosje dhe lëndë narkotike:
Policia e Korçës ka proceduar penalisht edhe shtetasit B. D. (26 vjeç), A. K. (25 vjeç) dhe D. N. (26 vjeç), të tre banues në Tiranë, ndërsa ka shpallur në kërkim A. K., 36 vjeç, banues në Korçë.
Sipas hetimeve, 36-vjeçari dyshohet se i ka vjedhur një shumë lekësh shtetasit D. N. në ambientet e një lokali, ndërsa ky i fundit dhe dy shokët e tij kanë kanosur babain e autorit të dyshuar.
Gjatë kontrollit fizik, shtetasit B. D. iu gjet një sasi lënde narkotike e dyshuar kanabis, e cila u sekuestrua në cilësinë e provës materiale.
Konflikt mes të miturve:
Po në qytetin e Korçës, për 10 shtetas të mitur, të moshave 13 deri në 17 vjeç, nisi procedim penal pasi janë konfliktuar me tre 14-vjeçarë, për motive të dobëta.
Zbardhet një vjedhje e ndodhur më herët në Korçë:
Në vijim të hetimeve për ngjarjen e datës 17 tetor, ku shtetasi A. P. kallëzoi vjedhjen në dyqanin e tij në lagjen nr. 3, policia identifikoi dhe procedoi penalisht autorin e dyshuar, A. A., 64 vjeç, banues në Korçë.
Raste të tjera në Pogradec dhe Maliq
Në Pogradec, u proceduan penalisht:
D. H., 39 vjeç, nga fshati Dardhas, pasi u kap duke transportuar lëndë drusore të prerë në mënyrë të kundërligjshme;
A. B., 42 vjeç, nga fshati Slabinjë, i cili u gjet me armë gjahu dhe municion pa leje.
Në Maliq, u proceduan penalisht shtetasit Xh. A., 32 vjeç dhe I. P., 49 vjeç, pasi dyshohet se janë konfliktuar fizikisht me njëri-tjetrin, për motive të dobëta.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme hetimore.
