Galeria e Arteve Digjitale Korçë ju fton në një përvojë unike që bashkon artin, teknologjinë dhe edukimin në një ekspozitë multimediale 360°, të frymëzuar nga libri për fëmijë “Arti i Barabarti”.
Kjo ekspozitë transformon mesazhet e librit në një udhëtim vizual dhe ndjesor që prek zemrat e të vegjëlve dhe të rriturve njësoj. Përmes një formati interaktiv dhe përfshirës, fëmijët dhe familjet do të mund të eksplorojnë vlera themelore për një bashkëjetesë të shëndetshme dhe gjithëpërfshirëse.
Ekspozita rrëfen në mënyrë vizuale dhe ndjesore vlera të rëndësishme si toleranca, përfshirja, respekti për ndryshimet, unikaliteti ynë si njerëz dhe barazia që na bashkon.
“Arti i Barabarti” është më shumë se një ekspozitë, është një hapësirë për dialog, ndjeshmëri dhe edukim emocional, që synon të ndërtojë ura mirëkuptimi mes brezave.
Ky projekt realizohet me mbështetjen e Ministrisë së Ekonomisë, Inovacionit dhe Kulturës.
