Në ambientet e Galerisë së Bibliotekës “Thimi Mitko” në Korçë u hap ekspozita “Artizania” e artistes Natasha Çapa, një homazh për traditën, punën e dorës dhe bukurinë që lind nga duart e gruas shqiptare.
Me një koleksion veprash që pasqyrojnë kujdesin, durimin dhe dashurinë për artin tradicional, Natasha Çapa solli një frymë autentike në qytet, duke rikthyer vëmendjen te artizanati si formë e gjallë dhe e fuqishme e shprehjes artistike.
“Për mua puna e dorës është më shumë se zanat – është pasion, është mënyrë për të komunikuar pa fjalë. Çdo qepje, çdo detaj ka një histori, një ndjenjë, një kujtim,” – u shpreh artistja gjatë hapjes së ekspozitës.
Ekspozita “Artizania” mbetet një thirrje për ruajtjen e identitetit kulturor, për fuqizimin e gruas nëpërmjet krijimtarisë dhe për vlerësimin e punëve të dorës.
Aktivitete të tilla e konfirmojnë edhe një herë Korçën si një qytet me traditë, që vazhdon të ruajë dhe trashëgojë vlera të tilla autentike.
