Pogradeci edhe këtë sezon turistik mbetet destinacion i kërkuar nga turistët vendas e të huaj për bukuritë që ofron, se bashku me fshatrat turistik të Linit e Tushemishtit si dhe trashëgiminë e kulturës në zonën e Mokrës.
Operatorët turistike janë bërë gati pasi rezervimet e turistëve të huaj kanë filluar që në muajin Maj e do vazhdojnë deri në muajin Tetor. Sipas tyre gatimet tradicionale të peshkut janë më të kërkuara nga vizitorët e huaj.
Drejtoresha e të ardhurave pranë bashkisë së Pogradecit Enjela Karafili ka bërë me dije se këtë vit ndryshe nga viti i kaluar hapësira e plazheve publike do të jetë 40%, me çadra falas dhe hapësira edhe për personat me aftësi të kufizuara.
Në ditën e çeljes të sezonit turistik krahas turistëve vendas nuk kanë munguar edhe turistët e huaj, të cilët shprehen se mikpritja e banorëve por dhe gatimet të bëjnë të duash qytetin e Pogradecit.
“Jam nga Izeaeli, jetoj ne Itali, i dua njerëzit këtu, jane kaq mikpritës, natyra është kaq e bukur, kam dy javë këtu në Pogradec e do vazhdoj të rri e për dy javë të tjera. Padyshim që i kam sugjeruar edhe të tjerëve të vijnë, familjes, të dashures, ushqimi është kaq i shijshëm, unë shkoj nëpër restorante dhe bëhem shok me pronarët, çmimi është i lirë, në vendet e tjera të duket sikur te vjedhin, këtu është kaq ndryshe ” – tha turisti nga Izraeli.
Kryetari i Bashkisë Pogradec Ilir Xhakolli tha se ka rezervime të shumta me turistë vendas e të huaj. Sipas tij 18 mijë turistë gjermanë kanë rezervuar në qytetin liqenor.
Pogradeci ditën e sotme ka çelur sezonin turistik ku operatorët turistike kanë ekspozuar gatimet e tyre tradicionale ndërkohë që ka patur e aktivitete të shumta ujore e artistike
