Sot në mëngjes në kullën Downtown One, në pronësi të oligarkut Shefqet Kastrati, kishte prezencë të lartë të policisë dhe ambulancave.
Ka pasur aksident një punëtor, thoshin. Policët në vendngjarje nuk jepnin asnjë përgjigje.
Disa gazetarë filluan të pyesin zyrtarë të policisë por ata përgjigjeshin “kush të tha ty?!” ose me mbyllje të telefonit.
Pak më parë policia doli me një gjysmë deklaratë ku thuhet se i rrëzuari nuk është punëtor, por një banor i dehur e në depresion që është hedhur nga kulla.
Policia e Shtetit duhet të publikoj kartelën mjekësore të viktimës ku tregon nga çfarë vuante ai ekzaktësisht.
Policia e Shtetit duhet të na tregoj se si ka hyrë një “i pirë i depresionuar” në një nga zonat më të shtrenjta e të sigurta të Tiranës.
Policia e Shtetit duhet të publikoj autopsinë dhe emrin e mjekut që e ka bërë, sepse shpesh tek mjekësia ligjiore kur jemi paraqitur na kanë thënë: “hajdeni të hënën se fundjava është pushim”.
Media dhe gazetarët duhet të hulumtojë për këtë rast dhe të informojë publikun për të vërtetën, qoftë me dokumentacionin e viktimës, dëshmitë e punëtorëve të ndërtimit në atë kullë, me pyetjet e familjarëve të viktimës dhe me publikimin e pamjeve të kamerave të sigurisë së Downtown One.
Shpejtësia e policisë për këtë rast dhe gjithë këto pikëpyetje bëjnë që të dyshohet fortë që mund të kemi të bëjmë me një fshehje të një ngjarje të rëndë, siç është vdekja e një punëtori në vendin e punës.
