Policia e Korçës ka arrestuar shtetasin E. Q., 22 vjeç, nga fshati Bregas, për dhunë ndaj babait të tij, i cili është pajisur me urdhër mbrojtjeje.
Ndërkohë, ka nisur procedimi penal për shtetasin A. L., 42 vjeç, banues në Tiranë, i cili shkaktoi aksident në lagjen nr. 17 në Korçë.
Po ashtu, një zjarr në fshatin Ravonik ka djegur 25 derra dhe bazë ushqimore, dyshohet si pasojë e një shkëndije elektrike.
Njoftimi i policisë;
Drejtoria Vendore e Policisë Korçë
Specialistët për Hetimin e Krimeve të Komisariatit të Policisë Maliq arrestuan në flagrancë shtetasin E. Q., 22 vjeç, banues në fshatin Bregas, pasi dyshohet se ka ushtruar dhunë ndaj babait të tij, i cili u pajis me urdhër mbrojtjeje.
Në vijim të informacionit të dhënë ditën e djeshme, për aksidentin në lagjen nr. 17, Korçë, bëjmë me dije se specialistët e Sektorit të Qarkullimit Rrugor referuan materialet në Prokurori, ku filloi procedimi penal për shtetasin A. L., 42 vjeç, banues në Tiranë, për veprën penale “Shkelja e rregullave të qarkullimit rrugor”.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
–
Korçë/Rreth orës 07:50, në fshatin Ravonik, ka rënë zjarr në stallën e shtetasit V. F., dyshohet për shkak të një shkëndije elektrike. Si pasojë e flakëve janë djegur rreth 25 derra dhe një sasi bazë ushqimore për ta.
Grupi hetimor po punon për dokumentimin e shkakut të rënies së zjarrit.
