Dy automjete janë përfshirë nga flakët në orët e para të mëngjesit të sotëm në fshatin Sovjan, pjesë e bashkisë Maliq. Sipas informacioneve paraprake, njëri prej mjeteve është djegur plotësisht, ndërsa tjetri ka pësuar dëmtime pjesore.
Shkaqet e zjarrit janë ende nën hetim, ndërsa dyshohet se zjarri mund të ketë nisur për shkak të telave të energjisë elektrike që ndodheshin pranë vendngjarjes. Megjithatë, burime nga policia bëjnë me dije se për automjetin e djegur plotësisht nuk përjashtohet pista e një zjarrvënieje të qëllimshme.
Grupet hetimore ndodhen në terren për të zbardhur plotësisht rrethanat e ngjarjes. Deri më tani nuk raportohet për persona të lënduar.
