Drejtoria Vendore e Kufirit dhe Migracionit Korçë ka referuar në Prokurori dy raste të veprimtarisë së paligjshme të konstatuara në pikat kufitare të qarkut.
Specialistët për Hetimin e Krimeve të DVKM Korçë kanë nisur procedimin penal për shtetasin T. B., 38 vjeç, banues në Tiranë, i dyshuar për veprën penale “Kontrabanda me mallra për të cilat paguhet akcizë ose me pezullim nga detyrimet doganore ose të akcizës”. Gjatë kontrollit në Pikën e Kalimit Kufitar Tushemisht, në hyrje të Republikës së Shqipërisë, në automjetin e tij u gjet një sasi kafeje e dyshuar e kontrabanduar, e cila u sekuestrua si provë materiale.
Po ashtu, procedim penal ka nisur edhe për shtetasin S. A., 41 vjeç, banues në Turqi, për veprën penale “Ndihma për kalim të paligjshëm të kufijve”. Në Pikën e Kalimit Kufitar Qafë Thanë, gjatë procesit të skanimit të kamionit që ai drejtonte, në rimorkio u gjet e fshehur një shtetase e huaj.
Materialet procedurale i janë referuar Prokurorisë së Korçës për veprime të mëtejshme.
