Në qytetin e Korçës u çel ekspozita e qeramikës “Mbi Rrënjë”, organizuar nga Balta dhe Toka. Kjo ekspozitë unike ndërthur traditën me inovacionin, duke sjellë në qendër të vëmendjes rrënjët kulturore dhe lidhjen e ngushtë të njeriut me natyrën.
Punimet mbajnë firmën e artistes së re Yrmela Kaso, e diplomuar në Akademinë e Arteve në Tiranë, e cila prej disa vitesh i është përkushtuar qeramikës. Ajo sjell krijime dekorative dhe funksionale që ruajnë frymën tradicionale, por edhe një estetikë moderne.
Kaso ka hapur një studio në Korçë me mbështetjen e Fondit Shqiptar të Zhvillimit, ku punon së bashku me nënën e saj për të realizuar punime të ndryshme qeramike, duke e kthyer artin e baltës në një dialog mes brezave.
Ekspozita “Mbi Rrënjë” është një dëshmi e gjallë e forcës së trashëgimisë kulturore dhe mundësive të reja që arti bashkëkohor ofron.
