Ish-kryebashkiaku i Kukësit Safet Gjici, i përfshirë në një skandal seksual dhe i arrestuar më tej nga Policia e Tiranës, është lënë në burg nga Gjykata e Posaçme nën akuzën e korrupsionit. Mësohet se pas masës së sigurisë, ai është transferuar në paraburgimin e Durrësit, ku ndërkohë ndodhen edhe tre zyrtarë të tjerë të lartë, ish-kryebashkiaku Vangjush Dako, ish-ministri Lefter Koka dhe ish-deputeti i Partisë Socialiste, Alqi Bllako.
Mediat kanë bërë të ditur se Dako është në të njëjtën qeli me Bllakon, por nuk dihet se ku do e ketë fatin Gjici, nëse do t’i bashkohet Kokës në të njëjtën qeli, apo do të marrë hapësirën e vet.
Mesa duket, edhe nga raportimet e deritanishme edhe pse në mënyrë anonime, ka një arsye pse të gjithë zyrtarët e lartë të rënë në ‘rrjetën e ligjit’, dërgohen në Durrës.
Një vit më parë, gazetarja Anduena Llabani, referuar burimeve të saj që i mbajti anonim, ka deklaruar se Koka dhe Bllako lejoheshin nga punonjësit e policisë që të dilnin nga paraburgimi për orë të tëra për dreka dhe kafe.
Gjithsesi, edhe nëse kjo nuk është pranuar apo faktuar zyrtarisht, 4 zyrtarët me rrugëtime të ndryshme politike, dhe të akuzuar penalisht për çështje të ndryshme, kanë çfarë mësojnë nga njëri-tjetri duke ndarë eksperiencat e larmishme, teksa presin lirinë apo dënimin.
