Një dhuratë me vlerë për qytetin e Korçës – Monografia e piktorit Fatmir Haxhiu i shtohet fondit kulturor të qytetit
Një tjetër vlerë i shtohet trashëgimisë kulturore të qytetit të Korçës. Familja Haxhiu ka dorëzuar zyrtarisht në Bashkinë e Korçës monografinë e piktorit të njohur shqiptar, Fatmir Haxhiu, titulluar si “Piktor i Merituar” dhe “Mjeshtër i Madh i Punës”.
Ky botim përfaqëson një kontribut të rëndësishëm në dokumentimin e jetës dhe veprës së një prej figurave më të rëndësishme të artit figurativ shqiptar. Monografia do të pasurojë fondin e Galerisë së Arteve dhe Bibliotekës “Thimi Mitko”, duke u vënë në dispozicion të artdashësve, studiuesve dhe qytetarëve që dëshirojnë të njihen më nga afër me trashëgiminë artistike shqiptare.
Fatmir Haxhiu njihet si një ndër piktorët më të shquar të realizmit socialist, me një krijimtari të gjerë dhe ndikim të fortë në zhvillimin e artit në Shqipëri. Vepra e tij përfshin peizazhe, portrete, kompozime dhe punë monumentale, të cilat ruajnë vlera të spikatura estetike dhe dokumentare për kohën.
Kryetari i Bashkisë së Korçës, Sotiraq Filo, ka shprehur mirënjohjen ndaj familjes Haxhiu për këtë gjest simbolik dhe me peshë, duke theksuar rëndësinë që ka promovimi i figurave të artit kombëtar në jetën kulturore të qytetit.
Ky kontribut vjen si dëshmi e një lidhjeje të qëndrueshme midis qytetit dhe artit, dhe si një kujtesë se trashëgimia kulturore duhet ruajtur, vlerësuar dhe kaluar brez pas brezi.
