Në qytetin e Korçës, gjithnjë e më shumë fëmijë po zgjedhin të ndjekin kurse muzikore, duke iu përkushtuar instrumenteve të ndryshme si piano, violinë dhe kitarë. Qendra Kulturore e Fëmijëve “Mihal Grameno” është kthyer në një hapësirë të rëndësishme për edukimin artistik të të rinjve, ku veçanërisht kursi i violinës po tërheq një numër të madh pjesëmarrësish.
Instruktorja e violinës, Eriketa Bejleri, shprehet se interesimi për këtë instrument po rritet ndjeshëm, ndërsa fëmijët që ndjekin kursin e përjetojnë me pasion dhe emocion rrugëtimin e tyre muzikor.
“Ka një interes të madh për të mësuar violinën dhe shohim një përkushtim të jashtëzakonshëm nga fëmijët. Kjo tregon se arti muzikor vazhdon të mbetet një pjesë e rëndësishme e edukimit të tyre,” shprehet ajo.
Vetë fëmijët e përshkruajnë këtë eksperiencë si një mënyrë për të shprehur ndjenjat dhe për të zhvilluar talentin e tyre muzikor.
Rritja e interesit për kurset muzikore tregon se pasioni për artin mbetet i gjallë tek brezat e rinj. Qendra Kulturore e Fëmijëve “Mihal Grameno” vazhdon të ofrojë hapësira të rëndësishme për edukimin artistik, duke ndihmuar fëmijët të zhvillojnë talentet e tyre dhe të çojnë përpara traditën muzikore të qytetit të Korçës.
