Fermerët e mollëve në Dvoran po përballen me një situatë të vështirë ekonomike. Përveç dëmeve të shkaktuara nga ngricat dhe mungesës së çdo forme dëmshpërblimi nga shteti, ata vuajnë edhe nga mungesa e tregut për shitje. Më shumë se gjysma e prodhimit, sipas tyre, ka mbetur pa u shitur, çka nuk u mundëson as mbulimin e kostove të prodhimit. Në këto kushte, shumë fermerë detyrohen të ruajnë mollët në magazina frigoriferike, ndërsa të tjerë rrezikojnë që frutat t’u kalben në pemë.
Fermerët shprehin hapur pakënaqësinë për çmimet e ulëta të shitjes dhe konkurrencën e pandershme nga produktet e importuara. Ata kërkojnë ndërhyrjen e shtetit për të rregulluar tregun dhe për të mbrojtur prodhimin vendas.
Në një periudhë kur siguria ushqimore po diskutohet gjithnjë e më shumë pas alarmeve të autoriteteve ndërkombëtare, fermerët theksojnë se i kushtojnë rëndësi të veçantë cilësisë, duke përdorur me kujdes preparatet dhe pesticidet, gjithmonë në konsultim me agronomë dhe në përputhje me standardet evropiane.
