Fshati Polenë ka mirëpritur mijëra banorë, turistë dhe vizitorë në edicionin e radhës të Festës së Lakrorit, një organizim i përvitshëm i Bashkisë së Korçës që kthen vëmendjen te kulinaria tradicionale e juglindjes.
Në qendër të këtij aktiviteti të dashur veror ishte lakrori tradicional me dy petë, i cili mbetet një prej specialiteteve më të njohura dhe përfaqësuese të kuzhinës korçare. Amvisat e zonës e kanë përgatitur këtë gatim duke ndjekur me përpikëri recetat e trashëguara brez pas brezi, për t’ua shërbyer të pranishmëve të shumtë.
Promovimi i traditës përmes kulinarisë
Përtej shijimit të gastronomisë, atmosfera festive është shoqëruar me muzikë popullore, valle dhe gatime të tjera tradicionale, duke bërë bashkë banorët e Polenës, zonave përreth dhe vetë qytetit të Korçës në një festë të përbashkët.
Kjo ngjarje vazhdon të shërbejë si një mjet i rëndësishëm për promovimin e kulturës dhe traditës vendase. Sipas organizatorëve, festa po tërheq çdo vit e më shumë vëmendjen e vizitorëve vendas dhe të huaj, duke e kthyer Polenën në një pikë referimi për turizmin kulturor dhe atë gastronomik në qarkun e Korçës.
