Festivali i Teatrit të Kukullave “Xinxifilo” çel siparin këtë javë në qytetin e Pogradecit, duke shndërruar sërish qytetin buzë liqenit në një skenë të madhe artistike për fëmijët. Ky festival, që tashmë është kthyer në një traditë të përvitshme kulturore, zhvillohet në datat 4–7 qershor 2025, duke sjellë një mozaik shfaqjesh dhe emocionesh nga trupa të ndryshme teatrale nga mbarë Shqipëria dhe rajoni.
Organizuar nga Teatri i Kukullave “Piro Xëci”, në bashkëpunim me Bashkinë e Pogradecit dhe Qendrën Kulturore të Fëmijëve, festivali “Xinxifilo” promovon artin skenik për fëmijë dhe bashkëpunimin mes teatrove të kukullave nga qytete të ndryshme.
Në edicionin e sivjetshëm marrin pjesë trupa nga Pogradeci, Berati, Elbasani, Tetova, Korça, Vlora, Prishtina dhe Tirana.
Çdo ditë e festivalit sjell shfaqje të ndryshme në ambientet e Teatrit të Kukullave dhe Qendrës Kulturore, ndërsa dita e fundit, e shtuna, do të përmbyllet me ceremoninë e ndarjes së çertifikatave, si një formë vlerësimi për pjesëmarrësit dhe kontributin e tyre në promovimin e këtij zhanri artistik.
“Xinxifilo” nuk është thjesht një ngjarje kulturore, është një hapësirë magjike ku kukullat marrin jetë, ku fëmijët zbulojnë botën e teatrit dhe ku arti përçon vlera ndër breza. Me një jehonë që çdo vit po rritet, ky festival po konsolidohet si një nga ngjarjet më të rëndësishme të teatrit për fëmijë në Shqipëri.
