Këtë fundjavë startojnë ndeshjet e para të kampionateve kombëtare të volejbollit për femra dhe meshkuj. Skënderbeu do të ketë debutimin në transfertë ndaj Vllaznisë, në një përballje që pritet me interes të madh.
Tek ekipi i femrave, korçaret janë riformatuar pothuajse nga e para, ndaj sfida e Shkodrës shihet si një test i rëndësishëm për të parë reagimin e vajzave të rrjetës. Ndërkohë, meshkujt e Skënderbeut kanë ruajtur një pjesë të mirë të titullarëve, por edhe Vllaznia në shtëpi mbetet një skuadër për t’u respektuar dhe që di të bëjë gjithmonë ndeshje të forta.
Një tjetër element që i jep edhe më shumë vlerë dueleve të para është fakti se të dyja skuadrat e Skënderbeut, si te femrat ashtu edhe te meshkujt, kanë përfshirë në përbërje lojtarë të huaj. Pikërisht ata do të jenë baza mbi të cilën do të ndërtohen objektivat e këtij sezoni, duke sjellë eksperiencë dhe cilësi shtesë në parket.
Të dy ekipet e Skënderbeut hyjnë në këtë kampionat me synimin për të bërë një paraqitje dinjitoze dhe për të luftuar për maksimumin gjatë gjithë edicionit.
