Një tjetër vatër zjarri në Qarkun e Korçës. Kodrat e fshatit Leminot në Maliq u përfshinë sot nga flakët, në një tjetër episod shqetësues që i shtohet situatës alarmante të zjarreve në qarkun e Korçës.
Zjarri shpërtheu në mesditë dhe përfshiu një sipërfaqe prej afro dy hektarësh me bimësi të ulët. Fatmirësisht, reagimi i shpejtë i zjarrfikësve, punonjësve të shërbimit pyjor dhe banorëve vendas bëri që flakët të vihen nën kontroll përpara se të përhapeshin më tej.
Dyshimet e para flasin për një zjarrvënie të qëllimshme, ndërsa policia ndodhet në terren dhe ka nisur hetimet për identifikimin e autorëve të mundshëm.
Ndërkohë, autoritetet i bëjnë apel qytetarëve të tregojnë kujdes dhe të raportojnë çdo rast të dyshimtë, pasi zjarret jo vetëm dëmtojnë natyrën, por vënë në rrezik edhe jetën e komunitetit.
