Në ditët e para të hapjes së Skemës Kombëtare të Mbështetjes për Bujqësinë, në qarkun e Korçës është shënuar një fluks i konsiderueshëm aplikimesh nga fermerët. Vetëm gjatë tre ditëve të para, janë regjistruar rreth 620 aplikime, duke dëshmuar interesin e lartë për përfitimin nga subvencionet shtetërore.
Fermerët kanë mundësinë të aplikojnë në 8 skema të ndryshme, që përfshijnë bujqësinë, blegtorinë dhe bletarinë. Ashtu si në vitet e mëparshme, skema e naftës vijon të jetë më e kërkuara, duke përbërë pjesën më të madhe të aplikimeve të deritanishme.
Mbështetja me naftë pa akcizë konsiderohet nga fermerët si një ndihmë konkrete për të ulur ndjeshëm kostot e prodhimit bujqësor, sidomos në sektorët ku mekanizimi është thelbësor. Por këtë vit nuk kanë munguar edhe aplikimet për blegtorinë dhe bletarinë, sidomos pas zgjerimit të kritereve dhe përfituesve në këto sektorë, çka ka rritur ndjeshëm interesin, veçanërisht në zonat malore dhe kodrinore të rajonit juglindor.
Sipas specialistëve të bujqësisë në nivel vendor, mbështetja që ofrohet përmes këtyre skemave është një lehtësim real për ekonomitë familjare të fermerëve, në një kohë kur sfidat e tregut dhe rritja e kostove të inputeve bujqësore kanë ndikuar ndjeshëm te fitimet e tyre.
Megjithatë, ndryshime janë aplikuar edhe në kriteret e aplikimit. Ndryshe nga vitet e mëparshme, këtë vit aplikuesve u kërkohen dokumente shtesë, përfshirë skicat e tokës bujqësore, faturat e blerjes së inputeve bujqësore apo të shitjes së prodhimeve, duke synuar transparencë më të madhe dhe verifikim të saktë të përfituesve.
Afati për aplikim për të gjitha skemat është deri më 30 maj, pas së cilës do të nisë procesi i verifikimit në terren nga ana e specialistëve të drejtorive rajonale të bujqësisë.
Ky program kombëtar synon jo vetëm të nxisë prodhimin vendas dhe vetëpunësimin në fshat, por edhe të rrisë formalizimin e sektorit bujqësor dhe të përmirësojë cilësinë e produkteve shqiptare në tregun e brendshëm dhe atë të jashtëm.
