Vijon të jetë i lartë fluksi i lëvizjes në pikat e kalimit kufitar të Kapshticës dhe Qafë-Thanës edhe gjatë 24 orëve të fundit. Nga Greqia, shumë emigrantë kthehen për të kaluar pushimet pranë familjarëve të tyre.
Gjatë këtyre orëve të fundit, nga Greqia kanë hyrë në Shqipëri 5,890 shtetas dhe kanë dalë 4,504 shtetas. Për të përballuar fluksin, policia kufitare po punon me nga tre sportele në hyrje dhe dalje.
Ndërkohë, nga Maqedonia e Veriut gjatë 24 orëve të fundit kanë hyrë 5,553 shtetas dhe kanë dalë 4,363 shtetas. Sipas burimeve të sigurta, rreth 75% e atyre që kanë hyrë dhe dalë përmes kësaj pike kufitare janë shqiptarë nga vendi fqinj, të cilët kanë deklaruar se do të kalojnë pushimet në vendin tonë. Edhe në këtë pikë kufitare po punohet me maksimumin e sporteleve.
