Në kulmin e sezonit veror, në pikat e kalimit kufitar të juglindjes është regjistruar një fluks i shtuar hyrjesh, kryesisht nga emigrantë që kthehen për të kaluar pushimet pranë familjeve të tyre dhe turistë të huaj që kanë zgjedhur bregdetin shqiptar. Në Kapshticë kanë hyrë 5625 shtetas dhe kanë dalë 4371, ndërsa në Qafë Thanë kanë hyrë 5752 dhe kanë dalë 4589 shtetas.
Policia Kufitare ka bërë të ditur se për të përballuar fluksin janë marrë masa shtesë, duke punuar me kapacitete maksimale në sportele, me qëllim lehtësimin e procedurave dhe shmangien e radhëve të gjata. Po ashtu, janë shtuar patrullimet në territorin përreth për të garantuar rendin dhe sigurinë e udhëtarëve.
Autoritetet kufitare nënvizojnë se situata mbetet nën kontroll dhe qytetarët po kalojnë kufirin pa vonesa të konsiderueshme, pavarësisht numrit të lartë të lëvizjeve në këtë periudhë të vitit.
