Federata Serbe e Futbollit ka vendosur që përballja e 11 tetorit ndaj Shqipërisë të mos zhvillohet në Beograd, por në Leskovac, në stadiumin e ri “Dubočica”. Vendimi lidhet me shqetësimet për trazira dhe sigurinë në kryeqytet, duke shtyrë autoritetet të kërkojnë një skenar më të kontrolluar.
Stadiumi “Dubočica”, i cili ka një kapacitet prej vetëm 8,136 vendesh, u inaugurua në vitin 2023 pas një investimi prej 28 milionë eurosh. Deri më tani, Serbia ka zhvilluar katër ndeshje në këtë impiant, duke e përdorur gjithnjë e më shumë si alternativë ndaj Beogradit.
Më herët, Serbia kishte synuar të luante edhe ndeshjen me Anglinë në këtë stadium, por kërkesa u refuzua nga federata angleze.
Ky zhvillim pritet të ketë ndikim të madh në atmosferën e sfidës ndaj kuqezinjve, duke qenë se stadiumi i vogël i Leskovacit nuk ofron të njëjtin presion dhe shkallë rreziku si impiantet e mëdha të Beogradit.
