Fshati Lin, një nga vendbanimet më të veçanta në brigjet shqiptare të Liqenit të Ohrit, është shpallur zyrtarisht “Ansambël Arkitektonik Urban”. Ky vlerësim e ngre Linin në një nivel të ri mbrojtjeje dhe promovimi kulturor, duke e përfshirë në zonën shqiptare të Trashëgimisë Botërore të UNESCO-s, si pjesë e “Trashëgimisë Natyrore dhe Kulturore të Rajonit të Ohrit”.
Statusi i ri nënvizon peizazhin unik që bashkon natyrën dhe kulturën: rrugicat e ngushta me kalldrëm, banesat karakteristike me çati të ulëta e mure guri, si dhe mënyrën e jetesës tradicionale që ruan shpirtin komunitar të fshatit.
Arkitektura vernakulare e Lin-it, ndërtuar me teknika dhe materiale vendase të përshtatura me klimën e butë dhe resurset lokale, mbetet një shembull i rrallë i harmonisë midis njeriut dhe natyrës.
Ky status i dhënë nga institucionet e trashëgimisë kulturore synon të ruajë autenticitetin e fshatit, të nxisë turizmin e qëndrueshëm dhe të rrisë ndërgjegjësimin për rëndësinë e mbrojtjes së vlerave arkitektonike e natyrore të zonës.
Fshati Lin, me historinë, bukurinë dhe përkushtimin e banorëve për ta mbajtur gjallë traditën, tashmë renditet mes destinacioneve më të çmuara të trashëgimisë shqiptare.
