Lini, fshati piktoresk buzë liqenit të Ohrit, rreth 22 km larg Pogradecit është ndër atraksionet e preferuara jo vetëm për pushuesit vendas, por edhe për të huajt.
Pas zbulimeve të fundit më të jashtëzakonshme arkeologjike, ku Lini konsiderohet si vendbanimi palafit më i hershëm i zbuluar ndonjëherë në Europë, ai po tërheq edhe më shumë turistë të huaj.
Ministri i Ekonomisë, Kulturës dhe Inovacionit, Blendi Gonxhja ndau sot në rrjetet sociale pamje nga Lini, ku turistë të shumtë e kanë vizituar nga afër këtë atraksion, duke bërë fotografi dhe zbuluar bukuritë e mozaikëve të vjetër.
“Lini, vendbanimi më i vjetër në Europë, i cili këtë verë ka qenë një magnet për turistët, jo vetëm me bukurinë buzë Liqenit të Ohrit, por edhe me Bazilikën Paleokristiane, një monument i rrallë që ruan mozaikë të mrekullueshëm të shek. V–VI”, shkruan Gonxhja në postim.
Bazilika e Linit është vizituar këtë sezon nga 4735 turistë, prej të cilëve 3298 janë të huaj dhe 1437 vendas.
Në Lin vitet e fundit janë ndërtuar një sërë bujtinash, që mirëpresin me qindra turistë nga mbarë bota.
Lini, fshati i vogël buzë liqenit të Ohrit, që të shfaqet menjëherë sapo zbret Qafëthanën në Pogradec ka një bukuri të rrallë dhe peizazh mahnitës.
Gojëdhënat tregojnë që dikur gadishulli i Linit ka qenë një ishull i bukur me bimësi të dendur. Jeta në këtë gadishull ka filluar në periudhën e parë të Epokës së Hekurit (kohë së cilës i përkasin edhe mozaikët e famshëm të Linit, të cilët gjenden mbi kodër) dhe ka vazhduar deri në kohën e Mesjetës së Hershme. Ndërsa për origjinën e emrit ka shumë histori.
Njëra prej tyre thotë se, kur ushtarët e Jul Çezarit mbërritën në këtë kodër u mahnitën aq shumë, sa bërtitën “Lyhnidas”, që do të thotë “Liqeni i Dritës”. /ATSH
