Pas përfundimit të afatit zyrtar më 31 korrik, Inspektorati Kombëtar i Mbrojtjes së Territorit (IKMT) dhe Autoriteti Rrugor Shqiptar (ARRSH) pritet të nisin nga dita e sotme ndërhyrjet për prishjen e ndërtimeve pa leje përgjatë akseve nacionale Korçë–Pogradec dhe Korçë–Bilisht. Sipas paralajmërimit, çdo ndërtim që ndodhet më afër se 6 metra nga rruga dhe nuk disponon leje ligjore do të shembet me forcë. Mbi 100 biznese dhe 40 banesa rezultojnë të preken nga kjo masë.
Ndërkohë, brenda qytetit të Korçës ka vijuar ndërhyrja për lirimin e hapësirave publike në lagjet periferike, ku gjatë ditëve të fundit janë shembur rrethime të bizneseve dhe banesave që cenonin trotuaret apo rrugicat. Bashkia ka bërë të ditur se aksioni do të shtrihet edhe në lagjet kryesore të qytetit.
Situatë e tensionuar po regjistrohet edhe në zonën e pedonales, ku bizneset janë urdhëruar të heqin strukturat shtesë si pedana, tenda apo elementë dekorativë, duke lënë si afat përfundimtar datën 2 gusht. Përfaqësuesit e bizneseve kanë kundërshtuar këtë vendim, me pretendimin se tani shënohet fluksi më i lartë i turistëve.
Pas një takimi me kryetarin e bashkisë Korçë, Sotiraq Filo, është rënë dakord për një shtyrje të afatit për çadrat deri më 17 gusht. Një pjesë e bizneseve të zonës, ditën e djeshme kanë pezulluar përkohësisht shërbimin në shenjë proteste.
Bashkia e Korçës, nga ana tjetër, ka paralajmëruar zbatimin e projektit të unifikimit estetik për të gjitha bizneset që operojnë në pedonale.
