Në Korçë u inaugurua Qendra Rinore, një investim i rëndësishëm i Bashkisë në bashkëpunim me Ministrinë e Shtetit për Rininë dhe Fëmijët dhe Agjencinë Kombëtare të Rinisë. Kjo qendër, e rikonstruktuar dhe e pajisur me kushte moderne, është menduar si një hapësirë ku të rinjtë të shprehin energjinë, krijimtarinë dhe idetë e tyre, duke u bërë pjesë e aktiviteteve kulturore, edukative dhe argëtuese.
Ministrja Bora Muzhaqi e vlerësoi Korçën si një rast suksesi në krijimin e hapësirave rinore, duke theksuar se investimi tek të rinjtë është një investim tek e ardhmja. Nga ana e tij, kryebashkiaku Sotiraq Filo u shpreh se Korça tashmë ka infrastrukturën më moderne në Shqipëri të dedikuar për fëmijët dhe të rinjtë, duke u bërë një model për qytetet e tjera.
Qendra Rinore Korçë pritet të kthehet në një pikë referimi për brezin e ri, duke ofruar më shumë mundësi për zhvillim personal dhe pjesëmarrje aktive në jetën e komunitetit.
